【2025年2月經安老院一站通轉介，入住元朗區一私營護老院】
 

「佢對腳無力行唔到，試過喺屋企跌倒，兩個老人家扶對方隨時都會一齊跌…我第一次搵(護老院)，唔知從何入手，唔同人有唔同意見，當時都冇心情睇邊間好邊間唔好…」 - 黃太






黃伯伯與黃太在一起生活30 多年，隨年紀漸長，黃太多次親眼目睹黃伯伯在家中跌倒又無人支援，實在痛心，「之前佢喺屋企突然間跌倒先知道佢對腳有事但唔出聲，但我扶唔到佢，只可以搵方法令佢自己慢慢起番身，佢都好吃力，隻腳都痛…唔係忍心將佢放喺護老院，但我都年紀大，再過多幾年喺屋企都照顧唔到佢。」

黃太認為「搵護老院我覺得最重要係姑娘(的照顧)，我住個區得政府護老院，要好長時間先排到，知道要等咁耐就更加徬徨，加上當時都冇心情睇邊間好邊間唔好，就算睇亦都唔知好唔好。於是醫務社工介紹我聯絡「安老院一站通」，好彩遇上鍾姑娘，佢好細心解釋，我表達希望護老院冇宗教背景。」於是個案主任先向黃太解釋護老院的類型與基本資訊，再根據她的要求配對有空位之合適護老院並安排參觀。

黃太繼續提及「我第一次參觀就揀咗呢間護老院，呢度搭車方便，又有外展醫生每3 個月幫老人家覆診，唔洗再自己帶佢番醫院覆診，我都好放心。而家護老院會安排2 個人扶先生試吓練行同埋做物理治療，都會推佢出嚟睇下電視。」黃太深深體會到護老院的幫助「先生都唔聽我講，話換片又唔聽，佢而家起碼會聽呢度姑娘講。」她也希望在往後日子待先生身體復原，可以帶他外出飲吓茶，做一些他喜歡的事。

後記：當天黃太帶著黃伯伯喜愛的蛋撻和煲了一碗湯，坐在他身邊陪著他慢慢享用，黃伯伯微微一笑，像是回到了年輕時的幸福相處時光。